Habari za Punde

*MABALOZI, WAFANYABIASHARA WACHANGA TSHS BILIONI 1.4 KUSAIDIA WAATHIRIKA WA TETEMEKO LA ARDHI KAGERA

 Waziri Mkuu Mhe.Kassim Majaliwa Majaliwa akipokea mfano wa hundi ya shilingi milioni kumi  kutoka kwa katibu Mkuu Wizara ya Mambo ya Nje na Ushirikiano wa Afrika Mashariki Balozi Aziz Mlima wakati wa uchangiaji wa waathirika wa tetemeko mkoani Kagera uliofanyika Ikulu Jijini Dar es Salaam.
 Mwakilishi wa Ubalozi wa China,makampuni ya China na wananchi wa china akikabidhi mfano wa hundi ya milioni mia moja kwa  Waziri Mkuu Mhe.Kassim Majaliwa Majaliwa wakati wa uchangiaji wa waathirika wa tetemeko mkoani Kagera.Wengine Pichani ni  Waziri wa Viwanda,Biashara na Uwekezaji Bw.Charles Mwaijage na Naibu Waziri Mambo ya Nje na Ushirikiano wa Afrika Mashariki Bi.Suzan Kolimba.
 Naibu Waziri Mambo ya Nje na Ushirikiano wa Afrika Mashariki Bi.Suzan Kolimba akizungumza kabla hajamkaribisha Waziri Mkuu Mhe.Kassim Majaliwa Majaliwa kuzungumza na wafanyabiashara na mabalozi  wakati wa uchangiaji wa waathirika wa tetemeko mkoani Kagera uliofanyika Ikulu Jijini Dar es Salaam.
  Waziri Mkuu Mhe.Kassim Majaliwa Majaliwa akiagana na Mwenyekiti wa Taasisi za Sekta Binafsi (TPSF), Bw.Reginald Mengi baada ya kumalizika kwa harambee ya uchangiaji wa waathirika wa tetemeko mkoani Kagera uliofanyika Ikulu Jijini Dar es Salaam.Mwenyekiti uyo alichangia shilingi milioni mia moja na kumi.
Waziri Mkuu Mhe.Kassim Majaliwa Majaliwa akizungumza na Wafanyabiashara na Mabalozi (hawapo pichani) wakati wa uchangiaji wa waathirika wa tetemeko mkoani Kagera uliofanyika Ikulu Jijini Dar es Salaam.

Mabalozi na wafanyabiashara mbalimbali wakimskiliza Waziri Mkuu Mhe.Kassim Majaliwa Majaliwa (hayupo Pichani) wakati wa uchangiaji wa waathirika wa tetemeko mkoani Kagera uliofanyika Ikulu Jijini Dar es Salaam.
***********************************************
Na Sheila Simba, MAELEZO
Jumla ya shilingi bilioni 1.4 zimechangwa na mabalozi na wafanyabiashara kwa ajili ya kusaidia waathirika wa tetemeko la ardhi lililotokea Mkoani Kagera.
Michango hiyo imetolewa leo jijini Dar es Salaam katika harambee iliyoongozwa na Waziri Mkuu wa Tanzania, Mhe. Kassim Majaliwa na kufanyika Ikulu.
Akizungumza katika harambee hiyo Waziri Mkuu alisema jumla ya nyumba 840 zimebomoka na kuharibika kabisa, wakati nyumba 1264 zimepata hitilafu na zinaweza kufanyiwa marekebisho ili watu waendelee kuishi katika nyumba hizo.
Mhe. Majaliwa ameongeza kuwa shule 4 za sekondari ambazo ni Nyakato, Ihungo, Kashange na Buhembe zimeharibika na mbili kati ya hizo yaani Ihungo na Nyakato zimefungwa  kutokana na kuharibika sana.
Madhara mengine yaliyosababishwa na tetemeko hilo kwa mujibu wa Waziri Mkuu ni kuharibika kwa vituo vya afya, miundombinu ya barabara, umeme na njia za mawasiliano na kufanya athari za tetemeko kuwa kubwa.
Kutokana na athari hizo Waziri Mkuu amewaomba mabalozi wanaoziwakilisha nchi zao hapa nchini kusaidia waathirika kwani ni tukio ambalo halikutarajiwa na limeleta hasara kubwa kwa wanakagera na Taifa kwa ujumla.
“Licha ya michango hii ninayowaomba leo, tutaandaa safari kwa anayehitaji kwenda kujionea hali halisi ili aone ni namna gani atakavyosaidia,”alisema Waziri Mkuu.
Aidha, Mhe. Majaliwa amesema kuwa imefunguliwa akaunti ya kuchangia katika maafa hayo kwenye benki ya CRDB inayojulikana kama KAMATI MAAFA KAGERA akaunti namba 0152225617300 na swift code ambayo ni CORUtztz na kuwaomba wananchi na watu wengine kutumia akaunti hiyo kwa kusudi hilo.
Majaliwa amesema pia kuwa utaratibu unaandaliwa ili kuwawezesha watu kuchangia kwa njia ya Mpesa, tigopesa na Airtelmoney. Utaratibu huo utakapokuwa tayari utatangazwa ili kuwarahisishia watumiaji wa mitandao hiyo kuchangia.
Katika harambee hiyo wafanyabiashara waliochangia ni Mwenyeki Mtendaji wa kampuni za IPP Dkt Reginald Mengi aliyechangia Tsh million 110, Mohamed Dewji ametoa milioni 100, Subash Patel milioni 150 na Salim Turki aliyetoa mifuko 5000 ya saruji  na mabati 3000.
Wengine waliochangia ni kampuni mbali mbali zikiwemo kampuni ya bia ya Serengeti iliyotoa mifuko 800 ya saruji, Sahara Tanzania wametoa shilingi milioni 20, Camel Oil kupitia Camel Cement wametoa mifuko 1000 ya saruji ,Puma wamechangia shilingi million 50, Pepsi Cola wametoa milioni 50 na Azania Group wamechangia milioni 50.
Baadhi ya mabalozi wanaowakilisha nchi zao hapa nchini waliochangia ni pamoja na ubalozi wa China shilingi milioni 100 na kupeleka madaktari,dawa,mahema na vifaa vingine kwa ajili ya kusaidia waliopatwa na maafa hayo.
Kuwait kupita ubalozi wao nchini wamechangi dola elfu 10 za Kimarekani na euro elfu 10, na Nchi ya Kenya iliyopeleka msaada wa mahema,magodoro na dawa.
Wizara ya Mambo ya Nje na ushirikiano wa Afrika Mashariki wametoa milioni 10, mwakilishi wa China Merchantile Group ametoa milioni 100, Toyota Tanzania milioni 10, Kamal Group milioni 50, Urban Group milioni 20, TBL milioni 100, IPTL 50, Tanzania Agriculturak Processing Zone milioni 30, Umoja wa wafanya biashara ya mafuta ya rejereja milioni 250 na Group Six wametoa tani 80 za saruji.
Wengine waliochangia ni pamoja Jambo plastic milioni 20, Tanga Cement mifuko 1000 ya saruji, Agusta Tz milioni 10, Oryx milioni 50, Kagera Sugar milioni 100 na tani 10 za sukari, Tipper milioni 20 ambapo GBP, Oilcom na Moil watajenga shule mbili zilizoharibika.
Uchangiaji huo umejumuisha pia na watu binafsi ambao ni wakili wa kujitegemea, Bwana Protase Ishengoma milioni 5 na Melisa Kataraiya milioni 20.
Tetemeko hilo la ardhi ni kubwa kuliko yote ambayo yamewahi kutokea hapa nchini na hadi sasa limesababisha vifo vya watu 17 na kuharibu nyumba, majengo na miundombinu mkoani Kagera. 

No comments:

Post a Comment

SUFIANIMAFOTO Copyright © 2014

Template images by Bim. Powered by Blogger.